新舊 Mini一向多人改，要豪要劈要騎呢乜都得，算係車壇改裝百搭王。但將行為藝術融入 Mini又會點？身兼導演同編劇嘅火火，就以黐滿膠花嘅古董 Mini，帶出千禧十年後嘅種種憾事，絕對有 Message帶出嚟，咪以為人哋真係黐膠花！
變身部屋 Mini
無 睇開舞台劇，可能你唔多熟火火，但話你知《狗咬狗》同《新紮師妹》系列都係出自佢手筆。今勻發晒花癲、將架古董 Mini Clubman黐滿膠花，為嘅係舞台劇新搞作《黐膠花園》。「我哋老竇阿爺嗰代，大多靠黐膠花維生，黐吓黐吓香港又變得花園咁繁榮，但呢十年個世界變得好 緊要，依賴電腦、巨星殞落、道德問題等。今次有成 20位 Artis演出，我都會粉墨登場，主要帶出幾十年前日本侵華，但今天港人卻追捧日貨，我唔係反日，我都好多日本朋友，只係想帶出人要自強嘅 Message。」唔多明，都係講番架車，「架車係我車行一位朋友嘅，特登揀咗架懷舊古董車黐滿膠花，令人一見難忘，最正係內櫳夠大可以 Hea，因為我會安排幾位 Artis喺車入面，起居飲食瞓覺困足 12粒鐘，作行為藝術街頭表演。」咁大鑊？唔怪得車入面有毛毛毯、大咕、迷你雪櫃呢啲日用品啦，唔知尿壺收埋喺邊呢？聽聞 Hotcha都有份，咁有禁室培育 Feel，真係幾黐膠花喎。
■迷你雪櫃真係有嘢飲，有埋得意鬧鐘叫你起身。
■鴨仔水泡好鬼得意，原來小動物亦係 Otto一個演出主題。
揸車出汗都唔開冷氣
■原來係 61製作發起人火火新搞作，將架 Mini Clubman變裝成花花部屋車。
20 位 Artis輪流演出，每日不同配搭，身為「膽」之一嘅 Otto，今次演出想講珍惜親情，「呢兩年雙親離開，令我好遺憾無抽更多時間陪佢哋，好傷感但我居然無喊過。」唔喊都當表演？「唔係，我會玩全場人手拖手再過電，不論能否成功過電到最尾個人手中盞燈，過程中人人十指緊扣，已講到我嘅 Message。」又係好深，好似仲有個環保主題？「係，以我揸車為例，停車熄匙、多搭公共交通，又或一架車兜晒 EO2四個人等，有經濟效益又環保。仲有我唔鍾意開冷氣，就算夏天會出汗，我都寧願開大個窗吹生風。」
■企高望架花花 Clubman又真係幾靚，似足迷你花園。
■ Clubman由 60年代開始量產，未黐膠花前相當正常。
■特大cushion加仿波斯毛毯，一定瞓得好舒服。
