舊 Mini夠經典，新 Cooper又有馬力，唔止得火火咁有創意黐膠花，全世界都有好多 Fans攞嚟改，係咁意搜集一下都有唔少出位例子：
尾廂藏酒
黐膠度：★★☆☆☆其實呢架車一啲膠味都無，仲好靚好豪華㖭。全車深啡配啞金色，襯出不凡氣派之餘，車櫳同車外都有唔少木紋飾板，好典雅。
■尾廂暗藏酒櫃，有埋保溫設備，靚酒唔怕焗壞。
超級加大碼
黐膠度：★★★★★Mini XXL名副其實，由迷你細車足足拉長至 6米，車內有酒櫃、 LCD、全景式天窗等，連車尾都改裝成按摩浴池。
似去街多過當差
黐膠度：★★☆☆☆紫襯黑，全架 Clubman令到發光咁滯，電鍍配件又多，連條軨都用密封式全電鍍， Bling Bling度 120%，完全唔似真警車。
最環保 Mini
黐膠度：★★★★☆08年北京奧運，車廠好鬼馬咁劏開架新 Clubman再駁上單車，變成 Mini黃包車。呢架車曾經係土瓜灣 Showroom展示過。
鷗翼起雙飛
黐膠度：★★☆☆☆武漢車迷發燒級改裝，包圍車殼胎軨大改特改，更將車門變成鷗翼式，雙門打開時勁有氣勢。
霸氣爬山車
黐膠度：★★★☆☆Mini係 61年同樣推出過 Pick-up農夫車，有車迷激到削尾頂再改成 4WD嘅四驅玩法，成架 Mini即時霸氣橫溢。
